الــــعراق الحبيب

وْما انت وحيد
انت الشعب كلة بشيعتة و سنتة
منهو الگالك ناسيك؟ هم ينسى الگمر وكتة؟
بس عشگكـ عشگـ مفضوح و عشگـ الناس كلها مساتر و سكتة
صرت انت سبت و برگبة يهودي
هم شايف يهودي يجوز من سبتة؟

*********************************

انت الفارس اليسبگـ هبوب الريح و ما ظن خيل سابگتة
و انت اليرهم ترابك كحل للعين و دوة للما شفت علتة
و من طينك نحني جفوف المعرسين و كل اصبع فرح من طيبتك طگتة
و انت الريحة ترابك ترد الروح .. هيل و زعفران و عنبر بشمتة
و مثل تراب گاعك ما لگينا تراب ... يرهم للصلاة من طينتة تربتة

********************************

انت ينام بيك المرتضى الكرار ... ابو الحسنين التلوذ الناس كلها بشارتة و بختة
و انت ينام بيك بكربلاء حسين .. الما بايع الطاغي و دنگـ رگبتة
و انت البيك ظلت شارة العباس ... لمن طاح دنگلة الفرات و باسة من شفتة

********************************

صح هسة اصبحت من وطن نيذرلاند ... هولندي الهوية و شعري جللتة
و صح تأقلمت وية الغرب فد نوب ... و صرت ماصخ مثلهم و الملح عفتة
و صح صرت ارطن رطنهم لمن يرطنون ... و لسان العرب بالاعجمي كسرتة
لكن مدري شنهي يصير بي لمن يمر طاريك ... احسنك دفو تموز وسط شتا
اثاريني مثل طبع النخل لو طال ... يرجع للاصول و تنحني شعفتة

********************************

العالم نسى يوم هدعش من ايلول ... صارت بيك سالفتة
ناس تگول لازم نحتويه و نشفط البترول ... و نعوض الراح و نسرگـ بركتة
و ناس تگول لازم ها الحصار يدوم ... و ناس تگول لازم ننزع اسلحتة
و ناس تگول خطية اطفالة ماتو من الجوع ... و ناس تگول حيل ويا ، ما حمد ربة و شاكر نعمتة
و انت بين هذا و ذاك صاير شبح لليرمون ... و ياهو الگام ضدك سدد تفـگَتة

********************************
چي انك حلو و الدول منة تغار ... ما عدهم العندك من مجد نلتة
انت اول وطن آدم وضع جدمة عليه و گال يا الله ... لنك وصلة من جنتة
و انت اول وطن حبّة النبي ابراهيم ... و دعا ربة يصونة برحمتة و عزتة
و انت اول وطن مرسى لسفينة نوح ... و النبي ايوب ناخت بيك راحلتة
و انت اول وطن علم العالم ابجدية و يكتب التاريخ و انت اول وطن قانون سننتة
و انت اول وطن گالتلة الشمس يمة صباح الخير ... و لو رادت تمسي تمسي يكم گَبتة
و انت اول وطن ما يشبه الاوطان ... مدري شلون خالقك ربك ، سبحان ربي شلون صورتة
صورتة العراق و بس علينة يلوگـ ... و احنة نلوگلة لمن يحل وكتة

كلمات الشاعر
المتألق
الشاعر عباس جيجان